Rannsóknir og þróun

Marel er leiðandi hátæknifyrirtæki á sviði þróunar á hágæðavörum og lausnum fyrir matvælaiðnað um heim allan

Frá ársbyrjun 2000 hefur Marel starfrækt sérstakan rannsóknahóp undir forystu dr. Kristins Andersens.

Helsta markmið rannsóknahópsins er að auka þekkingu á nýrri tækni sem Marel getur fært sér í nyt til bæði skamms og langs tíma og þannig skotið fleiri stoðum undir tæknigrunn fyrirtækisins.

Þessi rannsóknavinna er viðbót við vöruþróunarstarf, sem er snar þáttur í starfsemi Marel. Rannsóknahópurinn fæst einkum við eftirfarandi:

• Að færa ytri þróun og tækninýjungar inn í fyrirtækið.

• Að þróa nýja tækni innan Marel.

• Að efla samvinnu á sviði rannsókna og þekkingar við rannsóknastofnanir, háskóla, fyrirtæki og aðra aðila.

• Að vernda nýja þekkingu með einkaleyfum.

Rannsóknir

Rannsókna- og þróunarstarf í samvinnu við Rannsóknamiðstöð Íslands (RANNÍS)

Í áranna rás hefur Marel starfað náið með RANNÍS að ýmsum tækniþróunarverkefnum, þar á meðal tölvusjón og nýjum vinnslukerfum. Starfsumhverfi til rannsókna og þróunar ásamt menntun vísinda- og tæknimanna skiptir sköpum fyrir hvers konar hátæknifyrirtæki. Því tekur Marel virkan þátt í verkefnum á vegum RANNÍS.

Marel hefur unnið að ýmsum verkefnum sem EES hefur fjármagnað og metið. Eitt slíkt verkefni er ROBOFISH, sem var unnið í tveimur áföngum og hlaut mikið lof fulltrúa EES. Verkefnið fól í sér þróun á þjarkatækni til að afhausa fisk og tryggja hámarksnýtingu. Aðilar frá sex löndum tóku þátt í verkefninu en hlutverk Marel var að nýta tölvusjón til að staðsetja fiskinn fyrir þjarkann.
Þá fjármagnaði EES verkefni um mat á ávinningi af hópvinnu í hugbúnaðarþróun, en tölvunarfræðiskor Háskóla Íslands hlaut svipaðan styrk.

Marel er nú um stundir þátttakandi í norrænu rannsóknarverkefni um þróun og samanburð á aðferðum til að mæla raka í þurrkuðum fiski.

Áður hefur Marel tekið þátt í norrænu verkefni sem nefndist BENEFISH og gekk út á að beita tölvusjón til að meta fisk með tilliti til nýtingar.

Marel sækir árlega um 5-10 einkaleyfi fyrir hönd starfsmanna sem þróað hafa tækninýjungar, sem gerir Marel eitt af virkustu fyrirtækjum á þessu sviði hér á landi.

Einkaleyfisvernd er afar mikilvæg fyrir Marel því sterk staða og virði fyrirtækisins byggir að stórum hluta á tækninýjungum og reynslu starfsmanna.

Rannsóknagestir

Marel treystir böndin við vísindasamfélagið með því að sjá vísindamönnum fyrir starfsaðstöðu í takmarkaðan tíma.

Til dæmis starfaði norskur eðlisfræðingur hjá okkur um mánaðarskeið haustið 2001. Sérsvið hans eru mælitækni og myndgreining.