Fréttir

Hr. Ólafur Ragnar Grímsson og Katrín Jakobsdóttir ásamt vinningshöfum.

Alls bárust 1.600 hugmyndir alls staðar að af landinu í Nýsköpunarkeppni grunnskólanemenda í ár. Marel er aðal bakhjarl keppninnar sem haldin var í 19. sinn.

Verðlaun voru veitt í lokahófi keppninnar sem fram fór í húsakynnum Marel í gær, sunnudaginn 19. september, að viðstöddu fjölmenni. Forseti Íslands, hr. Ólafur Ragnar Grímsson verndari keppninnar, afhenti verðlaun og flutti hátíðarávarp. Katrín Jakobsdóttir, Mennta- og menningarmálaráðherra, afhenti þátttakendum viðurkenningarskjöl.

Forseti Íslands og Jóel Ingason hugmyndasmiður opna sýningu á hugmyndum barnanna.

Tilgangur keppninnar er að efla nýsköpunarstarf í grunnskólum og gera börnum grein fyrir sköpunargáfu sinni og hvernig þroska megi hana í gegnum vinnu með eigin hugmyndir. Keppnisflokkarnir voru sjö talsins  að þessu sinni: almennur flokkur, atvinnuvegir, hugbúnaður, hönnun, slysavarnir, leikföng og orka og umhverfi.

Farandbikarinn, sem veittur er fyrir hlutfallslega flestar hugmyndir í keppninni, hlaut Hofsstaðaskóli í Garðabæ.

Þá var Guðrúnarbikarinn afhentur í fyrsta sinn til heiðurs Guðrúnar Þórsdóttur heitinnar sem var ein af upphafsaðilum keppninnar. Dóttir Guðrúnar, Anna Hulda Ólafsdóttir afhenti ungri stúlku, Sigríði Tinnu Sveinbjörnsdóttur bikarinn fyrir framúrskarandi störf í vinnusmiðju NKG 2010.