Fréttir
Landsbankinn hyggst selja allt að 5 prósent eignarhlut í Marel
Landsbankinn hf. hefur ákveðið að bjóða til sölu allt að 5% eignarhlut í Marel hf. Um er að ræða þegar útgefin bréf í Marel, sem eru í eigu Landsbankans, en alls heldur Landsbankinn nú á 6,84% eignarhlut í Marel.
Markaðsviðskipti Landsbankans hafa umsjón með sölu hlutanna, sem mun fara fram í útboði þar sem notuð er undanþáguheimild frá útgáfu lýsingar, í samræmi við heimild í c-lið, 1. töluliðar, 1. málsgreinar 50. greinar laga nr. 108/2007 um verðbréfaviðskipti.
Lágmark hvers tilboðs er 100.000 hlutir að nafnverði í Marel, en lágmarksgengi í útboðinu verður 138 krónur á hlut og hámarksgengi verður 142 krónur á hlut.
Útboðinu verður þannig háttað að öll samþykkt tilboð bjóðast tilboðsgjöfum á sama verði. Lægsta samþykkta verð ræður söluverðinu. Nánari útboðsskilmálar, ásamt tilboðseyðublöðum, verða aðgengilegir hjá Markaðsviðskiptum Landsbankans eftir lokun viðskipta í Kauphöll í dag, mánudag.
Tekið verður við tilboðum frá og með þriðjudeginum 13. mars 2012 kl. 10:00 (GMT), en tilboðsfrestur rennur út miðvikudaginn 14. mars 2012 kl. 16:00 (GMT). Niðurstöður útboðsins verða birtar í Kauphöll að loknu útboði.
Nánari upplýsingar veita:
Helgi Þór Arason, forstöðumaður Markaðsviðskipta Landsbankans. Sími: 410 7335
Hreiðar Bjarnason, framkvæmdastjóri Markaða og Fjárstýringar Landsbankans. Sími: 410 7313