Fréttir
RóRó sigrar Gulleggið 2011
Sprotafyrirtækið RóRó sigraði í frumkvöðlakeppni Innovit um Gulleggið 2011, en Marel var einn af bakhjörlum keppninnar í ár.
RóRó er viðskiptahugmynd Eyrúnar Eggertsdóttur sem hefur fundið upp tæki sem hjálpar ungbörnum að sofa betur, líða betur og eykur öryggi þeirra. Eyrún vinnur nú að því að vinna hugmyndinni brautargengi á alþjóðamarkaði og sækja um einkaleyfi. Katrín Jakobsdóttir menntamálaráðherra afhenti sigurlaunin við fjölmenna athöfn á Háskólatorgi laugardaginn 3. apríl.
Öflugar athafnakonur röðuðu sér einnig í önnur verðlaunasæti, en í 2. sæti varð sprotafyrirtækið Puzzled by Iceland, sem stofnað var af Guðrúnu Heimisdóttur og Þóru Eggerstdóttur. Í þriðja sæti varð fyrirtækið Pink Iceland sem stofnað var af Evu Maríu Þórarinsdóttur Lange og Birnu Hrönn Björnsdóttur og rekur ferðaþjónustu sem höfðar sérstaklega til samkynhneigðra.
Nánari upplýsingar um keppnina er að finna á heimasíðu Innovit.