Úr vinnslunni
Afskurður minnkaði um helming
Eftir að Marel festi kaup á nokkrum framúrskarandi fyrirtækjum á undanförnum árum hefur vöruframboð fyrirtækisins aukist verulega.
Marel býður nú meðal annars upp á besta tækjabúnað sem völ er á fyrir frekari vinnslu, undir merkjum Townsend Further Processing. Townsend er eitt virtasta vörumerkið í greininni, einkum þegar kemur að búnaði til að móta og hjúpa hráefni – hvort sem um er að ræða fisk, kjúkling eða kjöt – sem og í eldunarbúnaði og pylsugerðarkerfum.
 |
| Vilbergur Flóvents Sverrisson, framleiðslustjóri Esju |
Esja kjötvinnsla, sem er með aðsetur í Dugguvogi í Reykjavík, hefur aukið áhersluna á vélvæðingu á síðustu árum og keypti meðal annars Townsend skinner frá Marel á síðasta ári. Tækið hefur skilað sér í stórbættri nýtingu í vinnslu á svína- og nautakjöti.
„Í svínakjöti hefur afskurður minnkað um 50% eftir að við fengum skinnerinn, sem hefur reynst okkur mjög vel,“ segir Vilbergur Flóvents Sverrisson, framleiðslustjóri Esju. „Tækið sker bara himnuna af en áður fyrr, þegar þetta var gert í höndunum, fór alltaf töluvert af kjöti með. Þetta skiptir verulegu máli þegar um er að ræða vöðva sem kosta frá kr. 1.500 uppí kr. 2.500 á kílóið þannig að tækið borgar sig upp á skömmum tíma.“
Vélvæðing og aukin sjálfvirkni hafa skipt gríðarlegu máli fyrir kjötvinnslu á Íslandi, að mati Vilbergs. „Vélvæðing gerir það að verkum að hraðinn er orðinn miklu meiri og nákvæmnin líka, sem til lengri tíma litið skila sér í lægra verði. Gæðin aukast að sama skapi því vélarnar framkvæma hlutina yfirleitt eins á meðan mannshöndin getur verið misjöfn.“
Markaðurinn biður um fullvinnslu
Esja þjónar fyrst og fremst veitingahúsum og mötuneytum í skólum og stofnunum. Fyrirtækið er með fullvinnslu og eldhús í sér húsnæði þar sem það framleiðir meðal annars tilbúna rétti, auk þess að undirbúa og forsteikja mat fyrir stór mötuneyti.
„Ég held að markaðurinn komi til með að þróast áfram í þessa átt og að fullvinnsla á matvælum verður almennt meiri. Það er meiri hraði í þjóðfélaginu og markaðurinn er að biðja um það. En gæðin þurfa jafnframt að vera í lagi.“
Esja flutti í núverandi 1.000 m2 húsnæði í Dugguvogi fyrir um áratug og er búið að sprengja það utan af sér. Fyrirtækið hyggur á flutning í stærra húsnæði á næsta ári og þá mun tækifæri gefast til að bæta ferla og auka sjálfvirkni enn frekar. „Það er markvisst átak hjá okkur að fækka handtökum í vinnslunni enda verður sífellt erfiðara að finna faglært starfsfólk,“ segir Vilbergur að lokum.
Frekari upplýsingar um Esju kjötvinnslu er að finna á vef fyrirtækisins www.esja.is