Vörur Marel

Marel framleiðir og þjónar viðskiptavinum sínum með flæðilínum, vogum, flokkurum, skurðarvélum, hugbúnaði og heildarlausnum af ýmsu tagi. Starfsemin hófst í fiskvinnslu með nánu samstarfi við forystufyrirtæki í greininni en tækniþekking og reynsla var síðar færð þaðan yfir í kjúklingaiðnað og annan kjötiðnað.

Með því að nýta sér það nýjasta í rafeindaverkfræði, hugbúnaðargerð og röntgengeislatækni hefur Marel gert matvælaframleiðendum kleift að auka framleiðslu sína ásamt því að bæta nýtingu, afköst og afkomu fyrirtækjanna.

Marel hefur í gegnum árin myndað náin tengsl við helstu matvælaframleiðendur bæði hér heima og erlendis, enda snúa þeir sér í auknu mæli til fyrirtækisins þegar leita þarf nýrra leiða í framleiðslunni. Þetta samstarf skiptir Marel verulegu máli, enda leiðir það oft á tíðum til nýrrar tækniþróunar og framleiðslu á nýjum búnaði.